آستانہ۔14اکتوبر(اے پی پی):پاکستان تے بیلاروس مشترکہ اقتصادی کمیشن دا اڳلا اجلاس جلدی کرݨ تے ایندی پیروی کوں یقینی بݨاوݨ تے اتفاق کیتے جیں توں ݙو پاسے اقتصادی رابطے کوں تقویت ملسی ۔وزیر اعظم آفس میڈیا ونگ توں جاری بیان موجب وزیر اعظم محمد شہباز شریف آستانہ اچ سیکا دے چھیویں سربراہی اجلاس دے موقع تے بیلاروس دے صدرالیگزینڈر لوکاشینکو نال ملاقات کیتی ۔ملاقات اچ ݙوہیں رہنماؤاں جاری ݙو طرفہ تعاون دا جائزہ ڳھدا تے سانجھی دلچسپی دے علاقائی تے بین الاقوامی امور تے ڳالھ مہاڑ کیتی ۔صدر لوکاشینکو آکھیے جو بیلاروس ماحولیاتی تبدیلی دے نتیجے اچ آوݨ آلے سیلاب پاکستان اچ غیرمعمولی تباہی مچائی اتے بیلاروس متاثرین دی بحالی کیتے ہر ممکن تعاون کریسی ۔وزیراعظم پاکستان اتے بیلاروس وچال تعاون دے سارے ممکنہ شعبیں اچ رابطے کوں وسعت ݙے تے دوستانہ تعلقات کوں مزید پکا بݨاوݨ دی خواہش ظاہر کیتی۔ݙوہیں رہنماواں پاکستان بیلاروس مشترکہ اقتصادی کمیشن دا اڳلا اجلاس وختی کراوݨ تے ایندی پیروی یقینی بݨاوݨ تے اتفاق کیتے جیں توں ݙو طرفہ اقتصادی رابطے کوں تقویت ملسی ۔علاقائی امور تے ڳالھ مہاڑ کریندے ہوئیں ݙوہیں رہنماواں امن، استحکام تے تعاون کوں ودھارا ݙیوݨ دی سانجھی خواہش دا اعادہ کیتا۔ ݙوہیں رہنماواں ایندے توں پہلے 15 ستمبر 2022 کوں سمرقند اچ شنگھائی تعاون تنظیم دے سربراہی اجلاس دے موقع تے ملاقات کیتی ہئی ۔ ھک مہینے اچ ݙو واری قیادت دی سطح تے ڳالھ مہاڑ مختلف شعبیں اچ سانجھے فیدہ مند تعاون کوں ودھاوݨ کیتے ݙوہیں پاسوں گھاٹی خواہش دی عکاسی کریندی اے ۔
