اسلام آباد۔8جون(اے پی پی) پاکستان تے ترکمانستان تاپی گیس پائپ لائن مشترکہ عملدرآمد منصوبے دے معاہدے تے دستخط کرݙتن جݙاں جو وزیراعظم محمد شہبازشریف آکھیے تاپی خطے دی خوشحالی کیتے اہم منصوبہ اے، منصوبے توں خطے کوں قدرتی گیس دی فراہمی ممکن تھیسی ، عالمی صورتحال دے تناظر اچ توانائی دی فراہمی ھک وݙا چیلنج اے، ایں منصوبے توں علاقائی تعاون اتے خوشحالی دے ھک نویں دور دا آغاز تھیسی ۔اے ڳالھ انہاں خمیس کوں تاپی گیس پائپ لائن مشترکہ عملدرآمد منصوبے دے معاہدے تے دستخط دی تقریب توں خطاب کریندے ہوئیں آکھی اے۔ دستخطاں دی تقریب خمیس کوں اتھاں منعقد تھئی۔ تقریب اچ وزیراعظم محمد شہبازشریف وی شرکت کیتی۔ پاکستان دی طرفوں وزیرمملکت پٹرولیم ڈاکٹر مصدق ملک اتے ترکمانستان دےوزیر مملکت و ترکمن گیس دے چیئرمین مکسات بابائیف دستخط کیتے ۔ایں موقع تے خطاب کریندے ہوئیں وزیراعظم آکھیے اڄ ھک وݙا ݙینھ اے ، پاکستان تے ترکمانستان تاپی گیس عملدرآمد منصوبے تے دستخط کیتن ۔ ایں کیتے ترکمانستان دے صدر اتے انہاں دی ٹیم دے شکر گزار ہیسے۔ تاپی ایں پورے خطے دی خوشحالی کیتے اہم منصوبہ اے ۔ اے منصوبہ اشک آباد توں شروع تھیسی تے افغانستان اتے پاکستان توں بھارت تئیں مکمل کیتا ویسی ، ایندے نال ایں خطے کوں منصوبے تے ٹھوس یقین دہانیاں اتے سانجھے طور تے طے شدہ شرطاں دے مطابق قدرتی گیس گھنݨ اچ مدد ملسی ۔ عالمی حالات دے تناظر اچ اڄ توانائی ھک حقیقی چیلنج بݨ چکیے تے پاکستان جیہے ترقی پذیر ملکاں کوں ایں چیلنج نال نبݨݨ کیتے جامع پالیسیاں تے فوری اقدامات دی لوڑھ اے ۔ تاپی توں علاقائی تعاون تے خوشحالی دے نویں دور دا آغاز تھیسی ۔ اپݨی ٹیم کوں ہدایت کریساں جو ایں منصوبے دی منصوبہ بندی اتے عملدرآم دے عمل کوں تکھا کیتا ونڄے ۔ انہاں آکھیے ترکمانستان دے وفد دے پاکستان دے دورے تے شکریہ ادا کریندوں جو ایندے نال اساکوں موقع ملیے جو دنیا کوں اے یقین ݙویسوں جو آپݨے ݙو پاسے تعلقات اتے اقتصادی تعاون دے ودھارے کیتے پرعزم ہیسے۔ ایں اہم موقع تے پاکستان تے ترکمانستان دی وزارت پٹرولیم کوں مبارخ ݙینداں ، ترکمانستان پاکستان دوستی زندہ باد ۔
