اسلام آباد۔29اکتوبر (اے پی پی):پاکستان بھارتی شہر تریپورہ اچ انتہا پسند ہندواں دی طرفوں مسلماناں دیاں ٻہوں ساریاں مسیتاں ، گھراں اتے دکاناں دی بھن تروڑ دی مذمت کیتی اے ، جمعہ کوں ترجمان دفترخارجہ بھارتی شہر تریپورہ اچ مسیتاں دی بیحرمتی اتے مسلماناں دے املاک دی بھن تروڑ تے سخت رد عمل دا اظہار کریندے ہوئیں آخھیے جو اے حملے گزریل ہفتے توں جاری ہن جݙاں جو ریاستی مشینری نہ صرف مسلماناں تے انہاں دی املاک دے تحفظ اچ ناکام رہی اے بلکہ مقامی مسلم تنظیماں کوں مدد ݙیوݨ اچ وی غیر ذمے واری رہی اے ۔ترجمان آکھیے جو بی جے پی۔آر ایس ایس گٹھ جوڑ دے تحت ہندوتوا دی ریکارڈ 2002 اچ گجرات توں گھن تے 2020 اچ نئی دہلی تئیں مسلماناں دے قتل عام اتے منظم انسانی حقوق دی خلاف ورزیاں توں بھری پئی اے ، اڄ دے ہندوستان اچ اقلیتاں کیتے ٻہوں گھٹ جاہ اے ، جیڑھا جو ٻہوں مذمت دے قابل اے۔ترجمان آکھیے جو اے وی اتنا قابل مذݨت اے جو آسام اچ مسلماناں دی انہاں دے ݙھاکیں پراݨے گھراں توں ٹارگٹڈ اتے ظالمانہ بے دخلی دا سلسلہ جاری اے۔ پاکستان عالمی برادری توں مطالبہ کریندے جو او اسلامو فوبیا دی ودھدی لہر اتے بھارت اچ اقلیتاں بالخصوص مسلماناں دے خلاف حملیں کوں روکݨ کیتے آپݨا کردار نبھاوے اتے انہاں دی حفاظت، سلامتی اتے فلاح و بہبود اتے انہاں دیاں عبادت گاہواں اتے ثقافتی ورثے دیاں جہیں دے تحفظ کوں یقینی بݨاوے۔
