اسلام آباد۔18جنوری (اے پی پی) وفاقی وزیر برائے ماحولیاتی تبدیلی سینیٹر شیری رحمان آکھیا جو دنیا کوں موسمیاتی تبدیلیاں پاروں ہک ٻہوں وݙے چیلنج دا سامݨا اے اتے پاکستان ایں توں ٻہوں متاثر اے، پاکستان دا موسمیاتی تبدیلیاں دے اسباب اچ حصہ نہ ہووݨ دے برابر اے پر ایندے باوجود چھل جیھی آفات دی تباہ کاریاں دی صورت اچ وݙی قیمت ݙتی اے۔ اے ہک ٻہوں وݙا چیلنج اے جئیں کوں سانجھی کوششاں نال نبڑݨا پوسی۔ اے ڳالھیں انہاں ڈیووس اچ عالمی اقتصادی فورم دے موقع تے پاکستان بارے تھیوݨ آلی تقریب توں خطاب کریندیں ہوئیں آکھی۔ وفاقی وزیر آکھیا جو ایں ویلھے دنیا کوں موسمیاتی تبدیلیاں پاروں ہک ٻہوں وݙا چیلنج اے اتے پاکستان ٻہوں متاثر اے۔ اڄوکے چھل اتے اوندے پاروں تھیوݨ آلی تباہی ایں ڳالھ دا نشابر ثبوت ہن جو موسمیاتی تبدیلیاں دے اثرات ٻہوں سنگین ہن۔ شیری رحمان آکھیا جو پاکستان اچ چھل پاروں 33 ملین لوک متاثر تھین، ٻہوں علاقے پاݨی تلوں آوݨ پاروں اٹھ ملین لوک ہݨ وی متاثر ہن۔ آبادیاں اتے انفراسٹرکچر دا ضیان تھیے۔ انہاں آکھیا جو اقوام متحدہ دے سیکرٹری جنرل خود متاثرہ علاقیاں دا دورہ کیتے اتے چھل دی تباہ کاریاں کوں ݙٹھن۔ اساں اقوام متحدہ دے سیکرٹری جنرل دا شکریہ ادا کریندوں جنہاں چھل متاثرین دی اوکھ کوں محسوس کریندیں ہوئیں پاکستان کیتے عالمی مدد اتے حمایت کیتے جنیوا کانفرنس دی سانجھی میزبانی کیتی۔
